Jun 24, 2015

എനിക്കും നിനക്കും

എനിക്കും നിനക്കും കാണേണ്ടത്
പുതിയൊരു പുലരിയുടെ തെളിച്ചമാണ്.
എനിക്കും നിനക്കും കേള്‍ക്കേണ്ടത്
സ്വാതന്ത്ര്യത്തിന്റെ ഗീതമാണ്‌.
എനിക്കും നിനക്കും പറയേണ്ടത്
ജീവിതത്തിന്‍റെ കഥകളാണ്.
എനിക്കും നിനക്കും അറിയേണ്ടത്
രാത്രിയിലെ മഴയുടെ ഗന്ധമാണ്.
പക്ഷെ,
എനിക്കും നിനക്കും ഇടയിലുള്ളതോ;
അളക്കാനാവാത്ത ദൂരമാണ്.
കാരണം,
എനിക്കും നിനക്കും ഇടയിലുള്ളത്;
പരിചയമില്ലാത്ത ദൈവങ്ങളാണ്,
തിരിച്ചറിവില്ലാത്ത മനുഷ്യരാണ്,
പിന്നോട്ട് നീങ്ങുന്നൊരു ലോകമാണ്.

Jun 17, 2015

മണ്‍സൂണ്‍ ധമാക്ക

കാരാക്കര്‍ക്കിടകം ന്ന്‍ കേട്ടിട്ടേ ഉള്ള്വപ്പ എന്ത്‌ മഴയാത്. മഴക്കാലത്ത് അമ്മയുടെ സ്ഥിരം ഡയലോഗാണിത്. പക്ഷെ നമ്മടെ പഴയ വീട്ടിന്‍റെ ഏറവാരത്ത്ന്ന്‍ മഴയെ കാണുന്ന ചന്തമോന്നും പിന്നീട് അച്ഛന്‍ പണിത കോണ്‍ക്രീറ്റ് വീടിന്‍റെ ബാല്‍ക്കണീന്ന്‍ കിട്ടീല. അവിടെ ഇര്ന്ന്‍ മഴയെ മര്യാദക്ക് കണ്ടിട്ടൂല ഇപ്പോഴും. അത്രേം രസുല്ല ഈ പന്ത്രണ്ടാമത്തെ നിലയിലെ എണ്ണൂറു സ്ക്വയര്‍ ഫീറ്റിന്റെ രണ്ടു മുറി ഫ്ലാറ്റിന്‍റെ ഒരു മൂലയിലെ കോലായില്‍ ഇരുന്ന്‍ താഴേക്ക് മഴ പെയ്യുന്നത് കാണാന്‍.
പണ്ടൊക്കെ കര്‍ക്കിടകംന്ന് പറഞ്ഞാ തിമിര്‍ക്കലാണ്. കാവിലെ കുളത്തില്‍ മണിക്കൂറുകള്‍ നീണ്ട കുളി. തോട്ടില്‍ നിന്നും വയലില്‍ നിന്നും മീന്‍ പിടുത്തം. മഴ നനഞ്ഞുള്ള സ്കൂളില്‍ പോക്ക്. ഞാനും അര്‍ജുനും അച്ചൂം ഞങ്ങളാരുന്നു അന്ന് ടീമ്. വെള്ളം ചവിട്ടി മാത്രേ സ്കൂളില്‍ പോകൂ. ചിലപ്പോ ഒരു കൊടേല് മൂന്നാള്. രസായിരുന്നു. അതാണെങ്കിലൊ ജൂണില്‍ തൊടങ്ങിയാ പിന്നെ ഓണം വരെ പെയ്യും നല്ല ഉശിരന്‍ മഴ. സന്ധ്യ മുതല്‍ തോണിയും ബോട്ടും ഉണ്ടാക്കി മുറ്റത്തെ ഇറവെള്ളചാലില്‍ ഇറക്കും. രാവിലെ മുറ്റം അടിച്ചു വാരാറാവുമ്പോഴേക്കും അതൊക്കെ കീറി നനഞ്ഞ് മുറ്റത്ത് ഒട്ടിപിടിച്ചു കിടപ്പുണ്ടാവും അപ്പോള്‍ തന്നെ കേള്‍ക്കാം അമ്മെടെയോ അമ്മമ്മയുടെയോ ചീത്ത. ഓരോ മഴക്കാലത്തും മിനിമം ഒരു രണ്ട് മൂന്ന്‍ കൊടയെങ്കിലും കളഞ്ഞിരിക്കും ഞാന്‍. അതിനും കിട്ടും ചീത്ത. അതങ്ങനെ പോയി കൊറേക്കാലം. പിന്നെ അച്ചു അവന്‍റെ കസിന്‍ ലച്ചൂന് വേണ്ടി വേറെ സ്കൂളിലേക്ക് മാറി. പക്ഷെ ഞങ്ങള് പലവഴിക്ക് പോയോന്നുമില്ല. പിന്നെ ഈ ലച്ചൂനോട് ഞങ്ങക്ക് ഒരു സിമ്പതി ണ്ടാര്ന്നു. കാരണം അവക്ക് അമ്മ ഇല്ല.

കൊറച്ച് കൂടി വളര്‍ന്ന്‍ മനസിനും മോഹങ്ങള്‍ക്കും നിറം പിടിക്കണ പ്രായായപ്പഴേക്കും മഴേടെ പേരൊക്കെയങ്ങ് മാറി, സൗമ്യ ന്നായി. അതിലുമുണ്ട് ഒരു കള്ളത്തരം. എന്തോ ഒരിത് എന്നൊക്കെ പറയുന്നത് കുട്ടിക്കളി വിട്ടുമാറിത്തുടങ്ങിയ ഹോര്‍മോണുകളുടെ കളികളല്ലെ.. സായിപ്പിന്‍റെ ഭാഷേല്‍ പറഞ്ഞാല്‍ ഇന്‍ഫാക്ച്യുഎഷന്‍. സ്കൂളിലേക്ക് പോകുന്ന വഴിയുള്ള ഏതെങ്കിലും കടത്തിണയില്‍ കാത്തുനില്‍ക്കും അവളോടൊപ്പം യുക്കാലിപ്റ്റ്സ് മരങ്ങള്‍ക്കിടയിലൂടെ ഒരു കുടകീഴില്‍ നടക്കാന്‍. രണ്ടു സീസണും കൂടി ചേര്‍ത്ത് അഞ്ചോ ആറോ മാസം, ആ മഴക്കാലം അങ്ങോട്ട്‌ തീര്‍ന്നു.
ഞാനും അര്‍ജുനും നാട്ടില്‍ തന്നെ എഞ്ചിനീയറിംഗിനു ചേര്‍ന്നു. അച്ചു ചെന്നൈയിലും. അങ്ങനെ മഴ ഞങ്ങളുടെ ജീവിതത്തില്‍ ടെക്നിക്കലായി പെയ്യാന്‍ തുടങ്ങി. അത്യാവശ്യം സപ്ലികളും, രാത്രി കോളിംഗും, ചാറ്റിങ്ങും, ചീറ്റിങ്ങുമൊക്കെയായി വിദ്യാഭ്യാസജീവിതത്തിലെ ഏറ്റവും മനോഹരമായ നാലു വര്‍ഷത്തിലെ ആദ്യത്തെ ഒന്നര വര്‍ഷം ഞങ്ങള് പിന്നിട്ടു. അതിനിടയില്‍  ആര്‍ത്തലച്ചു പെയ്യുന്ന ഒരു മഴയത്ത് വൈക്ന്നേരം ഗോയിന്ദേട്ടന്റെ ഹോട്ടലിലെ ചൂട് ബിരിയാണീം കഴിച്ച് വരുമ്പോആണ് അര്‍ജുന്‍ എന്നോടത് പറഞ്ഞത്. നമ്മടെ ലച്ചു അവനെ പ്രൊപ്പോസ് ചെയ്തത്രേ. മാത്രൂഅല്ല അവര് തമ്മില്‍ പൊരിഞ്ഞ ചാറ്റിനും തുടങ്ങീന്. എന്ത് ചെയ്യാനാ ?? എല്ലാം തീരുമാനായ സ്ഥിതിക്ക് പ്രത്യേകിച്ച് ഒന്നും ചെയ്യാനിണ്ടാര്ന്നില്ല, വെര്‍തെ കേട്ടോണ്ടിര്ന്നാമതിയാര്ന്നു. അതങ്ങനെ കഴിഞ്ഞു രണ്ടു കൊല്ലം. മഴേം വെയിലും മാറി മാറി വന്നിട്ടും അവരുടെ പ്രേമം പൊളിഞ്ഞില്ല. അവസാനം ഞങ്ങടെ കോഴ്സൊക്കെ കഴിഞ്ഞു. പാസ്സായിലെങ്കിലും അര്‍ജുന്‍ ആദ്യം ഗള്‍ഫില്‍ പോയി. പോകുന്ന ദിവസം ലച്ചുന്‍റെ കരച്ചില് ഭാഗ്യത്തിന് ആരും കണ്ടില്ല. മുന്നിലൊരു ലക്‌ഷ്യം തെളിഞ്ഞു നിന്നാല് മുന്നോട്ട് ജീവിക്കാന്‍ ഒരു വാശി തോന്നും അത് സ്വഭാവികം. ഒരു കൊല്ലം കൊണ്ട് തന്നെ അവന്‍ തരക്കേടില്ലാത്ത നെലേലെത്തി. അങ്ങനെ ഒന്നില്ലാത്ത കൊണ്ടാവും ഞാന്‍ എവിടേം എത്താഞ്ഞത്. നാല് വര്‍ഷം കൊണ്ട് സമ്പാദിച്ച സപ്ലികള്‍ എഴുതി തീര്‍ത്തു എന്നതായിരുന്നു ഒരേ ഒരു നേട്ടം.

ഒരു വര്‍ഷം കഴിഞ്ഞ് അര്‍ജുന്‍ നാട്ടിലെത്തി. ലച്ചുന് അപ്പൊ ബാംഗ്ലൂര് ഫാഷന്‍ ഡിസൈനിംഗിനു ചേരാന്‍ പോകണ്ട സമയാര്ന്നു. കൊറച്ച് ദിവസം കഴിഞ്ഞപ്പോ അവള്‍ പോയി. ഞാന്‍ വിചാരിച്ചത് അവര് തമ്മില്‍ കാര്യായിട്ട് കണ്ടിട്ടുണ്ടാവില്ലാന്ന. പക്ഷെ അര്‍ജുന്‍ കൊണ്ടുവന്ന വിസ്കി എന്‍റെ വീട്ടിന്‍റെ ബാക്കിലെ തെങ്ങുമ്പറമ്പില്‍ വച്ച് കുടിച്ചോണ്ടിരിക്കുന്നതിന്റെ എടയിലാണ് അവര് രണ്ടും കൂടി കൊട്ടേലും ബീച്ചിലും പോയ കാര്യം ന്നോട് പറഞ്ഞത്. അവന്‍ കിസ് വരെ കൊടുത്തൂന്നാ പറഞ്ഞെ.

അ പ്രാവശ്യത്തെ യൂണിവേഴ്സിറ്റി റിസള്‍ട്ട്‌ വന്നപ്പോ എനക്കും കിട്ടി ഡിഗ്രി. അടുത്ത വണ്ടിക്ക് വിട്ടു ബാംഗ്ലൂരിലേക്ക്. തട്ടിം മുട്ടിം ഒരു കൊല്ലം കൊണ്ട് ഒരു ഐ.ടിക്കാരനായി.
അതിന്‍റെ എടയില്‍  അര്‍ജുന്റെം ലച്ചുന്റെം റിലേഷന്‍ കുറച്ച് പേരൊക്കെ അറഞ്ഞു. കൂട്ടത്തില്‍ അച്ചുവും. അതോടെ തീര്‍ന്നു വര്‍ഷങ്ങളുടെ സൗഹൃദം. വര്‍ഷങ്ങളായിട്ട്‌ ഞാനും അര്‍ജുനും അവനെ ചതിക്കാര്ന്നുന്ന്‍ പറഞ്ഞ് അവന്‍ പോയി. 

ലൈഫിലെ എന്ത് വല്യ പ്രോബ്ളും മറക്കാന്‍ പറ്റുന്നത്ര ആഘോഷവും രസവും ആര്ന്നു ബാംഗ്ലൂരിലെ ദിവസങ്ങള്‍. അത് നമ്മളേം കൊണ്ടങ്ങനെയങ്ങ് പോവ്വാണ്. കള്ളും, സിഗരറ്റും, സ്റ്റഫും ചിലറ ചുറ്റികളികളും. അതിന്‍റെ ഇടയിലാണ് അവള് വീണ്ടും വന്ന് വീണത്; പഴേ സൗമ്യ. ഒരു മഴക്കാലത്ത് ഒരു കൊടെല് പോയ ബന്ധല്ലേ അങ്ങനെ കളയാന്‍ പറ്റ്വോ...?? അങ്ങനാ എഫ്.ബില് ചാറ്റിങ് തൊടങ്ങിയത്. ഞാന്‍ പറഞ്ഞില്ലേ നല്ല ബെസ്റ്റ് കമ്പനിയാര്ന്നു അന്ന് കൂടെ; അവന്‍മാരുടെ സപ്പോര്‍ട്ടും, പിന്നെ അവള്‍ടെ ഒരു ചായ്വ്വും.... അങ്ങനാണ് റൂട്ട് മാറിയത്. അപ്പൊ പക്ഷെ മഴയോന്നുണ്ടാര്ന്നില്ല. നല്ല തണുപ്പാര്ന്നു. അവളും ബാംഗ്ലൂര് തന്നായത് കൊണ്ട് രണ്ടു പേര്‍ക്കും നല്ല തണുപ്പ്. അവള്‍ടെ ഹബ്ബിയും നമ്മുടെ ലൈനാ ഐ.ടി. അവള്‍ടെ ഹബ്ബി ഓണ്‍സൈറ്റ് വര്‍ക്കിന് പോയപ്പോ ഞാന്‍ അവളേ  ഒരു മണ്‍സൂണ്‍ നൈറ്റ്‌ സ്റ്റേയ്ക്ക് ക്ഷണിച്ചു. കാട്ടില്. അവള് വന്നു. പ്രകൃതിടെ പച്ചപ്പ്‌ ആസ്വാദിച്ച് കൊണ്ടുള്ള പച്ച അവിഹിതം. ഭാഗ്യത്തിന് നല്ല മഴേം കിട്ടി.

പക്ഷെ അവിടുന്ന് വരുന്ന വഴി ഞാനൊരാളെ കണ്ടു. അര്‍ജുന്റെ സ്വന്തം ലച്ചൂനെ. അതും ഇത് തന്നെ. ഒന്നും നോക്കിയില്ല നൈസായിട്ട് ഒരു ഫോട്ടോ എടുത്ത് അവന് വാട്ട്‌സ്അപ്പ് ചെയ്തു. ഒന്ന് ശ്രദ്ധിച്ചോളാനും പറഞ്ഞു. തുലാവര്‍ഷത്തിന് മുന്‍പ് അവന്‍ അവളെ ഡിവോഴ്സ് ചെയ്തു. ഡിവോര്‍സ്ന്ന്‍ ഒരിത്നു പറഞ്ഞതാ. അവര് അങ്ങനെ ബ്രേക്ക്‌അപ്പ് ആയി. മാത്രല്ല അവരുടെ റിലെഷന്‍ നാട്ടിലപ്പോഴെക്ക് കുറെ പേര് അറഞ്ഞിരുന്നു. അര്‍ജുന്‍ അവന്‍ കണ്ടു പിടിച്ച കാര്യം എല്ലാരോടും പറഞ്ഞു. ലച്ചുനു നാട്ടിലെറങ്ങാന്‍ പറ്റാത്ത അവസ്ഥയായി. ഒരു ദിവസം ഫോണ്‍ ചെയ്ത് എന്നെ എന്തൊക്കെയോ പറഞ്ഞു, അവള് രജിസ്റ്റര്‍ മാരേജ് കഴിഞ്ഞ അവള്‍ടെ ഫ്രണ്ടിന്റെ ഒപ്പം പോയതാണ്ന്നൊക്കെ. ഞാന്‍ കാരണാ ഇങ്ങനൊക്കെ ഇണ്ടായത്നൊക്കെ.  ഒന്നാലോചിച്ചാല്‍ എന്ത് തന്നെയായാലും എനിക്ക് ലച്ചൂനെ കുറ്റം പറയാന്‍ ഒരധികാരവുല്ല. അതിലും കൂതറ പരിപാടി അല്ലെ  ഞാന്‍ ചെയ്തത്.

അപ്പോഴത്തെക്ക് ഒരു നാലഞ്ച് മാസം കഴിഞ്ഞു. ഞാന്‍ സൗമ്യേനെ അങ്ങ് ബ്ലോക്കി. നൊ ചാറ്റ്. നൊ കൊള്‍. എന്നിട്ട്  ട്രാന്‍സ്ഫറും വാങ്ങി നേരെ ഇങ്ങോട് വണ്ടി കേറി. നിങ്ങടെ സ്വന്തം കൊച്ചിക്ക്. ഇവിടത്തെ ഒരു മാളില്‍ വെച്ച് ഞാന്‍ ലച്ചുനെ വീണ്ടും കണ്ടു. അവള് എന്നേം. അവള് എന്നെ കണ്ടൂന്ന് എനിക്ക് ഉറപ്പാ. പക്ഷെ നോക്ക്വ പോലും ചെയ്യാതെ കടന്ന് പോയി.
അവളിപ്പോ വീട്ടില്‍ പോകാറുണ്ടോന്നോന്നും എനിക്ക് അറിയില്ല. ഇന്നിപ്പോ ഇതൊക്കെ ഓര്‍ക്കാന്‍ ഒരു കാരണംണ്ട് അമ്മ വിളിച്ചപ്പോ പറഞ്ഞു ലച്ചുന്റെ അച്ഛന്‍ മരിച്ചൂന്ന്.... ഒരാഴ്ചയായീന്ന്‍.... അവള് പഠിത്തം നിര്‍ത്തിന്നൊക്കെ കേട്ടാരുന്നു. ഇവിടിപ്പോ ഏതോ മാളില്‍ സെയില്‍സ് ഗേളാന്ന്‍ തോന്നുന്നു.

                                                                           *****

ഞാന്‍ പറഞ്ഞു നിര്‍ത്തി. ദീപ്തി ഒന്നും മിണ്ടാതെ കേട്ടിരിക്കുകയാണ്.

" പണ്ടൊരു റിലേഷന്‍ ഉണ്ടാരുന്നുന്ന്‍ അര്‍ജുന്‍ എന്നോട് പറഞ്ഞു. അന്ന് കാണാന്‍ വന്നപ്പോ. ഇതിപ്പോ ഡാഡിയോട് ആരോ പറഞ്ഞതാ. പിന്നെ എഫ്ബി ല് അവന്‍റെ ഗോവ ട്രിപ്പിന്റെ ഇടയില് റൊമാന്റിക്‌ ക്വോട്ട്സും കണ്ടു, ദെന്‍ വി തോട്ട്...... " ദീപ്തി പറഞ്ഞു.
" ഹേയ് നെവര്‍... ഈ നാട്ടുകാര് പറയുന്നത് കേള്‍ക്കാന്‍ പോകണ്ട വല്ല കാര്യവുമുണ്ടോ ഡാഡിക്ക്... ബട്ട്‌ ഒരു കാര്യത്തില്‍ എനിക്ക് സന്തോഷമുണ്ട് പണ്ട് എന്‍റെ ഒരു മിസ്റ്റെക്കില്‍ അവന് നല്ലൊരു പെണ്‍കുട്ടിയെ ഞാന്‍ നഷ്ടപ്പെടുത്തി. ഇപ്പോ എനിക്ക് അതിലും നല്ലൊരു കുട്ടിയെ അവനുമായി ചേര്‍ത്ത് വെക്കാന്‍ കഴിഞ്ഞല്ലോ."

ദീപ്തി തലകുലുക്കി ചിരിച്ചു.

"സാധാരണ ഞാന്‍ ദൈവത്തെ വിളിക്കാറില്ല എന്നാലും ഇപ്പോ വിളിക്കുന്നു. താങ്ക് ഗോഡ് !!!"
അവള്‍ വീണ്ടും ചിരിച്ചു.

"അപ്പൊ ഓക്കേ നവീന്‍. ഞാനിറങ്ങുവാണ്. " അവള്‍ എഴുന്നേറ്റു.

"കല്യാണത്തിന് ഞാന്‍ വിളിക്കണ്ട കാര്യമില്ല, ബട്ട്‌ ഇപ്പോ നമ്മള്‍ കുറച്ച് നേരത്തെ ഫ്രണ്ട്സായില്ലേ, സൊ ഞാനും ക്ഷണിക്കുന്നു, " വാതിലിനടുത്തേക്ക് നടക്കുന്നതിനിടെ അവള്‍ പറഞ്ഞു,
എനിക്ക് ഷേക്ക്‌ഹാന്‍ഡും തന്ന് അവള് പോയി. ഫോണില്‍ അര്‍ജുന്റെ നമ്പര്‍ ഡയല്‍ ചെയ്ത് കൊണ്ട് ഞാന്‍ വീണ്ടും ബാല്‍ക്കണിയില്‍ വന്നിരുന്നു.

" ഡാ എന്തായി.. " - അര്‍ജുന്‍

" കോപ്പ് അവന്‍റെ ഫേസ്ബുക്കിലെ സാഹിത്യമെഴുത്തും മാങ്ങതൊലിയും.. എല്ലാം ഇപ്പോ തീര്‍ന്നേനെ. ഡാ നിനക്കറിയോ അവള്‍ടെ അച്ഛന് എന്നെ പരിചയമുള്ള കൊണ്ട് എന്തോ ഭാഗ്യത്തിനാ ഇങ്ങോട്ട് വന്ന്‍ ചോദിക്കാന്‍ തോന്നിയത്... പക്ഷെ അവള്‍ടെ ചങ്കൂറ്റം ഞാന്‍ സമ്മതിച്ചു, ഇനിയിപ്പോ ണി അനുഭവിച്ചോ.." ഞാന്‍ ചിരിച്ചു കൊണ്ട് പറഞ്ഞു.

" അപ്പൊ നി എല്ലാ ഓക്കേ ആക്കി അല്ലെ? " അവന്‍റെ ശബ്ദത്തില്‍ ആശ്വസം.

" ഒരുവിധം. ആ മഴതുള്ളി മാഗസിന് വേണ്ടി കുറച്ച് നൊസ്റ്റാള്‍ജിയ പ്ലാന്‍ ചെയ്തതും കുറച്ച് കഥയും ഒക്കെ ചേര്‍ത്ത് ഒരു സാധനം അങ്ങട് അലക്കി, നിന്‍റെ ഫാവി ഫാര്യ ഫ്ലാറ്റ്,,, പിന്നെ മറ്റേ പെണ്ണിനെ ഇന്ന്‍ തന്നെ ഒഴിവക്കിയെക്കണേ..."

ഞങ്ങളുടെ സംസാരം തുടര്‍ന്ന്‍ കൊണ്ടിരിക്കവേ താഴെ മുറ്റത്ത്‌ കൂടി നടന്ന് ദീപ്തി ഗേറ്റ് വഴി പുറത്തേക്കിറങ്ങുന്നത് ഞാന്‍ ചെറു ചിരിയോടെ നോക്കി നിന്നു.

May 16, 2015

പുതിയ അനുഭവമായ് പെണ്‍നടന്‍...

Weekend ആയിട്ട് ഇന്ന്‍ വൈകീട്ടെന്താ പരിപാടീന്നു ചോദിച്ചവരോടൊക്കെ പറയാന്‍ നല്ല ഉഗ്രന്‍ മറുപടി ആ വെള്ളിയാഴ്ച എന്‍റെ കയ്യിലുണ്ടായിരുന്നു. 
" വൈകുന്നേരം ഏഴു മണിക്ക് നാടകം - പെണ്‍നടന്‍ ഏറണാകുളം ഫൈനാര്‍ട്സ് ഹാളില്‍ അത് കഴിഞ്ഞ് ഒരു മസാലദോശ കാപ്പി ഫ്രം ഇന്ത്യന്‍ കോഫീഹൗസ്. രാത്രി കൃത്യം പത്തു മണിക്ക് ലാല്‍ജോസിന്റെ ഇന്ന്‍ റിലീസായ പടം നീന സിനിമാക്സില്‍..."

നീനയും മസാലദോശയും തല്‍ക്കാലം അവിടെ നില്‍ക്കട്ടെ. ഇപ്പോള്‍ നമുക്ക് പെണ്‍നടനെ കുറിച്ച് പറയാം. വളരെ യാദൃശ്ചികമായി എന്‍റെ സുഹൃത്ത് മുകുളിന്‍റെ കൂടെ അവന്‍റെ ഒരു പരിചയക്കാരനെ കാണാന്‍ പോയപ്പോഴാണ് ഞാന്‍ ശ്രീ സന്തോഷ്‌ കീഴാറ്റൂരിനെ ആദ്യമായി കാണുന്നത്. അദ്ദേഹത്തെ പരിചയമില്ലാത്തവര്‍ക്കായി ഒന്ന് പരിചയപ്പെടുത്താം. 

സന്തോഷ്‌ കീഴാറ്റൂര്‍ 
 (വിക്രമാദിത്യനിലെ കള്ളന്‍ കുഞ്ഞുണ്ണി,  എന്നും എപ്പോഴുമിലെ ടാക്സി ഡ്രൈവര്‍)

ഒരു സിനിമാനടന്‍റെ താരജാഡകള്‍ ഇല്ലാതെ അദ്ദേഹം ഞങ്ങളോട് സംസാരിച്ചു. അതിനിടയിലാണ് പുതിയതായി അവതരിപ്പിക്കാന്‍ പോകുന്ന പെണ്‍നടന്‍ എന്ന ഏകാംഗനാടകത്തെ കുറിച്ച് അദ്ദേഹം വിശദീകരിച്ചത്. എന്തായാലും ചെല്ലാമെന്ന് ഉറപ്പുകൊടുത്താണ് ഞങ്ങള്‍ അന്ന് അവിടെ നിന്നിറങ്ങിയത്.


ഉത്സവപ്പറമ്പുകളിലും യുവജനോത്സവവേദികളിലും കണ്ടിട്ടുണ്ടെന്നതല്ലാതെ ഒരു പ്രൊഫഷണല്‍ നാടകം ഞാന്‍ അതുവരെ കണ്ടിട്ടില്ലായിരുന്നു. ഇതാണെങ്കില്‍ ഏകാംഗനാടകവുമാണ്. വളരെ പ്രതീക്ഷയോടുകൂടി തന്നെയാണ് അന്ന് വൈകുന്നേരം ഫൈനാര്‍ട്സ് ഹാളില്‍ എത്തിയത്.
സ്ത്രീകള്‍ നാടകാഭിനയത്തിനു മടിച്ചിരുന്ന കാലത്ത് പെണ്‍വേഷംകെട്ടി പെണ്ണുങ്ങളെപ്പോലും വിസ്മയിപ്പിച്ചിരുന്ന പ്രതിഭയായിരുന്നു ശ്രീ ഓച്ചിറ വേലുക്കുട്ടി ആശാന്‍. ആശാന്റെ ജീവിതകഥയാണ് പെണ്‍നടന്‍ എന്ന സന്തോഷ്‌ അരങ്ങില്‍ അവതരിപ്പിച്ചത്. ആംഗികം, വാചികം, സാത്വികം, ആഹാര്യം അഭിനയത്തിന്റെ ഈ നാല് ഉപാധികളും നൃത്തമുദ്രകളും തന്‍റെ മെയ്‌വഴക്കവും സമന്വയിപ്പിച്ച് സന്തോഷിലെ നടന്‍ ഒരേ സമയം ഒരു നാടകനടനായും അയാളുടെ പെണ്‍കഥാപാത്രങ്ങളായും നിറഞ്ഞാടി. അഭിനയത്തിന്‍റെ സൂക്ഷ്മാംശങ്ങളില്‍പോലും ശ്രദ്ധ ചെലുത്തുന്നതായിരുന്നു ഒരു മണിക്കൂര്‍ നേരം നീണ്ട ആ അവതരണം.


ചെറുപ്പം മുതല്‍ തന്നെ പെണ്‍വേഷങ്ങള്‍ മാത്രം ചെയ്യാന്‍ വിധിക്കപ്പെട്ട പാപ്പൂട്ടിക്ക് കുമാരനാശാന്റെ സ്ത്രീകഥാപാത്രങ്ങളെ നാടകമാക്കി അവതരിപ്പിക്കുന്ന ഒരു നാടകസമിതിയില്‍ മുഖ്യഅഭിനേതാവാകാന്‍ ക്ഷണം ലഭിക്കുകയും തുടര്‍ന്ന്‍ കുമാരനാശന്‍റെ സ്ത്രീകഥാപാത്രങ്ങളായ വാസവദത്തയായും ലീലയായും നളിനിയായും ചിന്താവിഷ്ടയായ സീതയായും പാപ്പൂട്ടി തിളങ്ങാനും തുടങ്ങുന്നു. അരങ്ങില്‍ നിന്നും അരങ്ങിലേക്കും, കഥാപാത്രങ്ങളില്‍ കഥാപാത്രങ്ങളിലേക്കുമുള്ള സഞ്ചാരങ്ങള്‍ക്കിടയില്‍ അയാള്‍ ജീവിതം തന്നെ മറക്കുന്നു. സ്വന്തം കാമുകിയെ പോലും മറക്കുന്നു. ഒരു ആണ്‍വേഷം ചെയ്യാന്‍ അയാള്‍ കൊതിച്ചിരുന്നുവെങ്കിലും അയാളെ പിന്നെയും പിന്നെയും തേടിയെത്തിയത് സ്ത്രീവേഷങ്ങള്‍ മാത്രമായിരുന്നു. പണവും പ്രശസ്തിയും ലഹരിയും അയാളെ പുതിയൊരാളാക്കി തീര്‍ക്കുന്നു.  തിരുവിതാംകൂറില്‍ നിന്നും ഒരു പെണ്‍കുട്ടി അഭിനയിക്കാന്‍ തയ്യാറായി സമിതിയിലേക്ക് വരുമെന്നുറപ്പായതോടെ പാപ്പൂട്ടിക്ക് ആ ജോലി നഷ്ടപ്പെടുന്നു. പണവും പ്രശസ്തിയും നഷ്ടമായ അയാളെ സ്വന്തം ഭാര്യ പോലും തള്ളിപ്പറയുന്നു. അയാള്‍ക്ക് എന്നും ഒരു പെണ്ണിന്റെ മണമായിരുന്നുവെന്നാണ് ഭാര്യ പറയുന്നത്. ആ സമയത്ത് മാനസിക നിലതെറ്റിയ പഴയ കാമുകിയെ പാപ്പൂട്ടി  സന്ദര്‍ശിക്കണം എന്ന ആവശ്യവുമായി അവളുടെ ഭര്‍ത്താവിന്‍റെ തന്നെ കത്ത് അയാളെ തേടിയെത്തുന്നു. അങ്ങനെ അയാള്‍ കല്‍ക്കത്തയിലേക്ക് പുറപ്പെടുന്നു. ശയ്യാവലംബയായ പൂര്‍വകാമുകിക്ക് വേണ്ടി അയാള്‍ തന്‍റെ പ്രിയവേഷങ്ങള്‍ വീണ്ടും ആടുന്നു. അയാള്‍ക്ക് അവളിലുണ്ടായ സ്വന്തം മകനെ ഒരുനോക്ക് കാണാന്‍ സാധിക്കാത്തതിന്റെ ദുഖവും പേറി പാപ്പൂട്ടി വീട്ടില്‍ തിരിച്ചെത്തുന്നു. തന്നെ ഇനി സ്നേഹിക്കാന്‍ സ്വന്തം ഭാര്യ പോലുമില്ല എന്ന തിരിച്ചറിവിനോപ്പം അരങ്ങില്‍ മാത്രമല്ല ജീവിതത്തിലും തനിക്ക് വാസവദത്തയുടെ ഗതിയാണെന്ന് വേദനയോടെ അയാള്‍ മനസിലാക്കുന്നു.  



ട്രൂപ്പ്‌ നാടകമായി തന്നെ ചെയ്യാമായിരുന്ന കഥയെ മനോഹരമായി അരങ്ങിലെത്തിക്കാന്‍ അഭിനേതാവിന് കഴിഞ്ഞിട്ടുണ്ട്. ഒന്നിലധികം രംഗങ്ങളില്‍ തന്‍റെ തന്മയത്വമാര്‍ന്ന അഭിനയശൈലി കൊണ്ടും ചടുലത കൊണ്ടും പ്രേക്ഷകരെ വിസ്മയിപ്പിക്കാന്‍ സന്തോഷിന് സാധിച്ചു. അരങ്ങില്‍ നിന്നുകൊണ്ട് തികച്ചും സ്ത്രൈണമായി അനായാസം സാരി ഉടുക്കുന്ന രംഗം വന്‍ കരഘോഷത്തോടെയാണ് കാണികള്‍ സ്വീകരിച്ചത്. അതു പോലെ തന്നെ കാമുകിയുമായുള്ള രതിക്രീഡയും, കര്‍ണ്ണനെ പോലുള്ള പുരുഷകഥാപാത്രങ്ങള്‍ ചെയ്യണമെന്ന സ്വപ്നരംഗവും പ്രേക്ഷകര്‍ക്ക് പുതിയ അനുഭവമായി.  ശയ്യാവലംബയായ കാമുകിയോട് സംസാരിക്കുന്ന രംഗം മികവാര്‍ന്ന ഒരു അഭിനയമുഹൂര്‍ത്തവുമായി.      

സംഗീതത്തിന്‍റെയും വെളിച്ചത്തിന്റെയും സാദ്ധ്യതകള്‍ അരങ്ങിലെ പ്രകടനത്തിന് മാറ്റുകൂട്ടുന്നവിധം അതിമനോഹരമായി ഉപയോഗിക്കാന്‍ സാധിച്ചു. മേക്കപ്പും ഗംഭീരമായി, പ്രത്യേകിച്ച് തലമുടി..
നാടകകല മരിച്ചിട്ടില്ലെന്നും അതിന് പുതിയ ഭാവങ്ങള്‍ നല്‍കാനും മറ്റൊരു തലത്തിലേക്ക് ഉയര്‍ത്താനും കഴിവുള്ളവര്‍ ഇവിടെയുണ്ടെന്ന്‍ ഇത്തരം അവതരണങ്ങള്‍ നമ്മെ ഓര്‍മ്മപ്പെടുത്തുന്നു. 

You might also like this

Related Posts Plugin for WordPress, Blogger...